Rabu, 06 Agustus 2008

SUMONDER FUCKING BLUES

Tahuk soresore di kantin sastra

Dengar Rolling Stone,

“I got the blues”

Dari Ebit pe radio

Qta minung kopi tumbu

Om Manus ada beking

“bukang maen ini kopi !”

Qta bilang pa Coy

“Pantas kopi dari Manado

Jadi kopi paling mahal

Di pasar Eropa

Nyanda heran kote

Pamerenta blanda dulu

Paksa orang Minahasa

Batanang kopi

Ada 80 sampe 120 hari pertaong

Torang pe oma deng opa dulu

Musti kase waktu

Urus kopi di kobong

Depe laste

Kopi yang dorang tanang susasusa itu

Dorang musti jual pa pamerenta blanda deng harga murah

Kopi yang dorang tanang susasusa itu

Dorang nimbole minung sandiri

Dorang tu nimau jual tu kopi

Dapa hongi deng anjing

Dapa pukul deng cambok

Tahuk soresore di kantin sastra

Gudang garam surya di bibir

Tinggal saujung kuku

Abu roko yang tatarbang

Angin paka kagekage

Kase inga abu pohong cingke

Orang Sonder ada potong

Di kobong Lengkoan, tetebesi,tundak,mapaso,

Lopa in tana, kokoken, pulutan, talun, mawale,

Lalek deng lopa in kopi

Orang Sonder ada potong

For beking kayu api

Pohongpohong cingke

Dorang beking kayu api

Lantaran pamerenta Repoblik Indonesia

Mulai dari Soeharto sampe SBY

Beking cingke nyanda ada harga sama skali

“Cuma jaman Gusdur katu”, dorang bilang

“Harga cingke bole tanae

Riki bole tiki saratus ribu lebe perkilo”

Co ngoni bayangkan

Orang gunung turung Manado

Bawa satu datsun cingke kring

Babale kamari so deng doi satu karong

Kong tu datsun fol deng barang blanjaan

Dari kulkas sampe handpon

Tahuk soresore di kantin sastra

Kopi tinggal tasisa ampas

Roko di jare tinggal tasisa puntung

Dari Ebit pe radio

Mick Jagger manyanyi

Bob Dylan pe puisi

“how does it feel

How does it feel

To be on your own

With no direction home

Like a complete unknown

Like a rolling stone?”

Qta buang tu puntung

Dari sela jarejare

Kong ambe tas abis bayar kopi

“Pulang Fred”, Ie’ tanya

“Qta mo ka puncak Temboan Rurukan

Qta, Weol, Sondey, Oroh deng Kalalo

Qta mo lia sanrais sambil babaca puisi !”

1 komentar:

andreasharsono mengatakan...

Aku suka puisi ini. Tapi jangan lupa Soekarno. Dia bikin susah Minahasa juga. Bahkan dia yang bikin mula pertama susah. Soeharto belakangan.